London-a pawikhawihna thlengah mi paruk thi
United Kingdon khawpui, London-ah kar kalte Inrinni zan khan London Bridge-a ke-a kalnaah mi pathum chuanna motor chu tlan lawnin kawng kalte an pawng chil a, mi paruk an thi. Hemi hnu hian pawikhawhtute hian a bula Borough Market area-a awmte chu chem nen an bei zui leh bawk. Pawikhawihtute hi police-te’n an kaphlum a ni.
London khawpuia pawikhawihna thlengah hian mi paruk an thih bakah mi dang 48-in hliam an tuar a ni.
Britain anti-terrorism officer, Mark Rowley chuan pawikhawihna thlen hun hi an ram sana-a zan dar 10.08 a nih thu a sawi a, a hmun hi hmun lun lai tak, restaurant leh pub eng emaw zat awmna hmun a nih thu a sawi. Pawikhawihna a thlen thu an hriat veleh police-te chu an kal nghal a, Borough Market-ah mi pathumte hi an kaphlum nghal tih a sawi.
Pawikhawihtute hian suicide vest ni awm tak an inbel vek a, mahse police-te chuan hengte hi a lem vek tih an hrechuak a ni.
London khawpuia thil thleng hi eng pawl mahin an tih a nih thu an la chhal lo.
Prime Minister Theresa May chuan pawikhawiha rapthlak tak thleng chu a dem thu sawiin, official-te nen thil awmdan pawh an inhrilh tawn reng tih a sawi. PM May-i hian nimin khan COBRA emergency committee a ko nghal bawk.
Ram hrang hrang hruaitute chuan London-a pawikhawihna thleng chu an dem thu an sawi a, US President Donald Trump chuan puih an ngaihna a piangah UK chu a pui dawn tih a sawi. France President Emmanuel Macron chuan pawikhawihna thlenga thi leh hliam tuarte chu a tawrhpui thu sawiin, France chuan Britain chu a thlawp zel dawn a ni, a ti. European Commisson President Jean-Claude Juncker, Canada Prime Minister Justin Trudeau, Australia PM Malcom Turbull, New Zealand PM Bill Egnlish leh ram hruaite dang dangte pawhin pawikhawihna thleng hi an dem thu an sawi a ni.
Inrinni zana London-a pawikhawihna thleng hi kumin chhunga Britain rama a thlen ṭum thumna a ni. March 22 khan kum 52 mi Khalid Masood chuan Westminster Bridge-a ke-a kalnaah a motor-in a tlan lawna kawnga awmte a pawng chil a, mi tam takin hliam an tuar. May 22 khan Machester Arena-a concert-na hmunah Salman Abede chuan thihchilh bomb tipuakin, mi tam tak an thi a ni.