Ram pali-in Qatar nena inzawmna titawp
Ram pali - Saudi Arabia, Egypt, Bahrain leh United Arab Emirates (UAE)-te chuan Qatar ram chu firfiak pawlte thlawpah puhin an inzawmna an chhu chat.
Qatar ram hian firfiak pawl hrang hrangte a thlawp niin an puh a, heng zingah hian Egypt-in firfiak pawla alo puan tawh Muslim Brotherhood pawh an tel niin an sawi.
Saudi state news agency SPA chuan Qatar nena an ramri, khawmual, tuipui leh boruak aṭanga inkalpawhnate pawh khar vek a nih thu a sawi. Hei hi an ram mipuite himna tura ti an nih thu an sawi bawk.
Egypt pawhin a airspace leh port-a Qatar aṭanga lut turte chu a dang vek bawk a ni.
UAE chuan an rama Qatar palai awmte chu darkar 48 chhunga an awmna chhuahsan turin a hriattir. UEA state news agency WAM chuan Qatar chuan firfiak pawlte chu a thlawp a, sum hmang pawhin a ṭanpui ṭhin niin a sawi.
Bahrain chuan Qatar hian an ram himna dinhmun a tiderthawng a, ramchhung inrelbawlnaah a inrawlh avangin an inzawmna a titawp ta tih a sawi bawk.
Yemen rama Houthi helpawl laka beihpui thlak mek, Saudi kaihhruai Arab ram ṭangrual pawlte pawhin ṭangrual pawl aṭangin Qatar chu an hnawtchhuak tih an sawi bawk. Qatar chu firfiakte tha tichak zawnga a chet avang te, firfiak pawl hrang hrang al-Qaida leh Islamic state bakah hel dangte a thlawp avangin an thawhhonaah a tel theih tawh loh thu an sawi. Yemen-a Houthi hel laka beihpui thlaknaah Qatar hian indo thlawhtheihna a tir ve a ni.
Ram pali-te’n Qatar nena an inzawmna an tihtawp thu an sawi chungchangah hian Qatar chuan engmah ala sawichhuak ve lo.
Hetih lai hian US Secretary of State Rex Tillerson chuan Gulf ramte chu inpumkhat leh lungrual taka awm tura a duh thu a sawi a, an harsatna neihte pawh sawi ho a, chinfel dan kawng ngaihtuah turin a ngen. An harsatna chingfel turin US-in tih theih a neih chuan a theih anga puih a inhuam tih a sawi bawk.