London beituah IS-te inchhal Police-te’n mi 12 man tawh

Kar kalta Inrinni zana London-a pawikhawihna thleng chu Islamic State (IS) firfiak pawl chuan an tih niin an sawi. Hetihlai hian police-te chuan pawikhawihna thlenga inhnamhnawiha rinhlelh mi 12 an man tawh.

London Bridge-a kea kalna hmuna awmte chu motor van hmangin pawng chil an ni a, hemi hnu hian Borough Market-a pawikhawihtu mi pathumte hian bar leh restaurant-a awmte an pawng beih leh bawk. Police-te chuan pawikhawihtu mi pathumte hi an kaphlum tawh a, thurualpui an nei em tih an chhui mek a ni. Pawikhawihna thleng lai mit-a hmutute chuan mi dangte an beih laiin mi pathumte hian ‘Hei hi Allah tan a ni’ tiin an au niin an sawi. Pawikhawihna thleng vanga thi hi mi pasarih an tling tawh a, mi dang tam takin hliam an tuar bawk.

Islamic State (IS) chuan an pawl news agengy, Aamaq-ah thuchhuah siamin, London-a pawikhawihna thleng chu an pawl mite tih a nih thu an sawi a, an mi leh state chu khaw­thlang mite bei chhunzawm turin an fuih bawk.

IS-te hian kumin chhunga Britain-a pawikhawihna lian tham thleng pathum chu an tih niin an lo chhal tawh a ni. March thlaa Westminister Bridge beihna leh, kar hnih liamtaa Machester-a concert neiha bomb tihpuah chu IS hian an tih niin an chhal a ni.

Police-te chuan Inrinni zana pawikhawihtu mi pathumte nihna chu an hrechiang tawh niin an sawi a, an hming pawh puanchhuah a nih thuai tur thu Metropolitan Police chuan a sawi.

London-a pawikhawihna thleng vang hian June 8-a an ram inthlanpui neih tur chu sawn a ni dawn lo tih Prime Minister Theresa May chuan a sawi a, mahse Pathianni khan pawikhawihna thleng an duh lohna lantir nan leh thi te an zahna lantirn nan Conservative leh eptu Labour Party-te chuan campaign an titawp lailawk. PM May-i chuan pawikhawihna thleng chuan democracy kalphung a tibuai dawn lo tih a sawi a, niminaṭang khan campaign hi a pang­­ngai anga kalpui leh nghal a ni.