Japan-in Akihabara tualthattu tihlum
Japan sorkar chuan kum 2008-a Tokyo-a mipui pawng beih a, mi pasarih thattu, kum 39 mi Tomohiro Kato chu a tihlum tih tualchhung media-te chuan an tarlang.
He pawikhawihna a thlen lai hian Kato hi kum 25 mi niin, Akihabara shopping district-a mipui pungkhawmte chu truck-in a su a, mi pathum a su hlum a ni. Hemi hnu hian kawnga kalte chu chema vit zui lehin, mi pali an thi a, mi dang pariatin hliam an tuar.
Pawikhawihna thlenna hmunah Kato police-te chuan an man nghal a, hemi hnu hian a thil tihsualah insawifiah a tum loh thu leh, online-a tihduhdahna a tawn avanga che a nih thu a sawi.
He pawikhawihna thleng hian Japan society-ah inhnialna tam tak tichhuakin, tawngpawng inthahna, online-in mi a thunun theihna leh kum naupang zawkte tana rilru lam hriselna ngaihpawimawh loh chungchangte an sawi nasa hle.
Japanese media-te chuan nimin khan kum 39 mi, Kato hi Tokyo Detention Centre-ah khaihlum a nih thu an sawi. Hei hi kumina Japan rama thiam loh chang tihhlum hmasak ber a ni. Nikum December thla khan mi pathum an khaihlum bakah thi tura hremna pek hi mi 100 chuang an awm mek bawk.
Kato-a'n chem hmanga mi a vihhlum aṭangin chem kawl thei chungchangah dan khauh zawk siam zui nghal a ni.
Japan hi developed ram zinga thi tura hremna, capital punishment la hmang tlemte zinga mi a ni a, international leh local human rights group-te sawisel pawh a tawk fo a ni.