London beitu zinga mi pahnih hming puang

London Police-te chuan kar kalta Inrinni zana London khawpuia pawikhawihna rapthlak tak thlentu mi pathum zinga mi pahnihte hming an puang.

Pawikhawihtu zinga pahnihte hi Pakistan rama piang, London khaw­chhak lam Barking-a cheng Khuram Shazad Butt (27) leh Morrocan-Libyan Rachid Redouane (30)-te an ni. Pawikhawihtute hi pathum an ni a, pakhat hming erawh chu puanzar a la ni ve lo.

Khuram Shazad Butt hi police leh Britain spy agency MI5 pawhin a hmain an lo chhui tawh a, mahse Inrinni zana an thiltih tum chung­changah intelligence report engmah a awm lo nia sawi a ni. Rachid Redouanne hi a ṭhenawm­te chuan rualkawm thiam tak, mi pangngai tak niin an sawi. Tunhma lamin pawikhawihna thila inhnamhnawihna a neih hriat a ni lo bawk.

Police-te chuan pawikhawihna thlentute hi an kaphlum a, he thil thlengah hian rinhlelh thila man mi 12-te chu thu zawhfiah an nih hnuah chhuah leh vek an ni tawh. Mi 12 an man zinga pasarih chu hmeichhia an ni. Pawikhawihna thleng vang hian mi pasarih an thi a, hliam tuar zinga mi 36 chu damdawi-inah enkawl chhunzawm an la ni a, an zinga mi 18-te chu an dinhmun a ṭha lo hle. Thawhlehni khan thi te sunna hun hman a ni.