Myanmar sorkarin loneitute ram pe kir

Myanmar sorkar chuan sipai sorkar hunlaia Yangon bial chhunga sorkarin loneitute ram a laksak zinga hectare 2,580 chu ram neitute hnenah a pe kir leh.

Sorkar hmasa hnuaiah khan agency hrang hrangte chuan loneitute ram hectare 3,717 an chhuhsak a ni. Sorkar thar chuan heng ramte hi a neitu dik takte hnenah pek kir leh tumin hma a la mek a ni.

Yangon Region Land Confiscation Review Committee chuan sorkarin ram a laksakte hi an endik hnuah hectare 2,850 hi pek kir leh turin a rel a ni. Committee chuan mimal ram tam zawk laksaktu hi Ministry of Defense leh Depatment of Human Settlement and Housing Development an nih thu a sawi.

Nikum khan Mandalay regional government pawhin hmarlam biala sorkar hmasain ram alo laksak tawh, hectare 14,175 zinga hectare 12,960 chu a neitute hnenah a pe let tawh bawk. Ayeyawaddy bial leh NayPi Taw Council area-ah pawh loneitute chu an ram pek kir an ni tawh bawk.

Sorkar hmasa hnuaiah hian private company leh sorkar department-te chu industry dinna leh khawpui tih lenna tur atana mimal ram an lak phalsak an ni a, mahse ram neitute nihna hi sorkar leh a ram an hmansak neitute bakah investor-te’n an inchuh buai zui fo a ni.