IS firfiakten inphen nan naupang an hmang : UNICEF

United Nations Child­ren`s Emergency Fund (UNICEF) chuan Islamic State (IS) firfiakte chuan Iraq rama Mosul khuaa sipaite nena an inbeihnaah naupangte chu inphenna atan an hmang fo niin a sawi.

Iraq rama UNICEF palai, Peter Hawkins chuan Iraq security force leh IS firfiakte inbeih mek­na, Mosul khawthlang lam bialah chuan naupang nuai khat vel awmin, dinhmun hlauhawm takah an ding mek niin a sawi. Mosul khawthlang lamah hian civil mi tam tak thah an ni a, naupang pawh tam tak thah tel an ni, a ti.

Iraq security force-te chuan an ram khawpui lian pahnihna, Mosul khua hi IS firfiakte kut aṭanga lak let tumin beihpui an thlak mek a ni. Mosul khawchhak lam bial chu sipaite hian an la let tawh a, khawthlang lam bial chu firfiakte kutah la awmin security force-te nen hian an inbei mek a ni. Sipaite chuan hnehna an chang dawn hnai tawh niin an sawi.