Iran parliament-ah thihchilh bomb puak

Iran parliament building leh revolutionary founder Ayatollah Ruhollah Khomeini thlan chu nimin khan beih a ni a, mi pathum an thi.

Tehran-a parliament complex-ah ralthuam keng mi pali lutin security guard leh midang pakhat an kaphlum a, parliament beitu zinga pakhat chuan parliament office building chhawng li-naah thihchilh bomb a tipuak bawk.

Islamic State (IS) firfiak pawl chuan pawikhawihna thleng hi an pawl tih a nih thu an puang nghal a ni.

Nimin vek khan Tehran chhim lama revolutionary founder, Khomeini thlan chu beih a ni bawk a, huan enkawltu a thi a, mi dang eng emaw zatin hliam an tuar a ni. He thlanah hian hmei­chhe pakhatin thihchilh bomb a tipuak nia sawi a nia, thlan pawn lamah hmeichhe pakhat grenade paruk lai keng chu man a ni. Khomeini mausoleum official chuan thlanah hian mi pali vel an lut a, silai an hmetpuak zui nghal niin a sawi.

Pawikhawihna a thlen lai hian Parliament session neih mek a ni a, session lai hi live-in pekchhuah a ni. Parliament leh Khomeini thlan beih a nih avang hian Interior Minister Abdolrahman Fazli chuan security council special meeting a ko nghal a ni.