London-a pawikhawitu pakhat dang hming puan chhuah leh a ni

London Police-te chuan kar kalta Inrinni zana London Bridge-a pawikhawihna thlentu mi pathum zinga pa­hnihte hming a puanzar hnuah, a pathumna hming chu nimin khan a puang ve leh ta.

Thawhṭanni khan pawi­khawihtu zinga pahnihte chu Khuran Butt leh Rachid Radouane-te an nih thu, London Metropolitan Police-te chuan an puang a, a pathumna chu an la hriatchian loh thu leh chhui mek a nih thu an sawi. Thawhlehni khan a pathumna hi hriat a ni leh ta a ni.

British police-te chuan pawikhawihtu zinga a pathumna chu kum 22 mi, Youssef Zaghba a nih thu an sawi a, tunhma lamin pawikhawihna lam hawia chetna leh rinhlelh thilah enthlak a la ni ngai lo tih an sawi.

Pawikhawihtu pathumte hian London Bridge-a ke-a kalnaah motor khalh lutin mipui awmte chu an pawng chil a, hemi hnu hian chem nen mi an pawng beih leh bawk. He pawikhawihna thleng vang hian mi pasarih an thi a, mi dang 48-in hliam an tuar a ni.