Turkey-ah Amnesty hotu man

Turkey rama Amnesty International hotu Taner Kilic chu Turkey sorkar paihthlak tumnaa mawhphurtu bera puh, Fethullah Gulen nen inzawmna neiah puhin man a ni.

Human rights organisation chuan thuchhuah siamin, Kilic leh mi dang 22-te chu Turkey khawthlang lam, Izmir-ah man an nih thu an sawi. Amnesty chuan Turkey thuneitute hnenah Kilic leh mi dang mante chu chhuah nghal tur leh, an laka thubuai siamsak pawh sut leh nghal tura an phut thu an sawi. Amnesty International secretary general Salil Shetty chuan Taner Kilic chu mimalin zalenna a neihte humhim tura thawktu ṭha tak a ni a, hei tak hi Turkey thuneitute chuan rahbeh sak an tum a ni, a ti. Kilic man a nih chhan hi Amnesty International tana a hnathawh nena inkaihhnawih thil nia an hriat loh thu an sawi bawk.

Turkey sorkar chuan nikum July 15-a Pre­sident Recep Tay­yip Erdogan leh a kaih­hruai sorkar paih­thlak tuma beih­naah khan US-a inkhuar, Fe­thullah Gulen chu mawh­phurtu berah a puh a, Gullen-a nena inzawmna neia puh sor­kar hnathawk 100,000 chuang zet chu ban leh suspend an ni tawh a ni. Mahse Gullen chuan an puhna hi thu dik lo niin a sawi thung.