Paris-a Nortre Dame Cathedral bulah police-te’n beih tawk

France khawpui, Paris-a Notre Dame Cathedral bula police officer duty-te chu Thawhlehni khan mi pakhatin hmanrua nen a bei a, officer pakhatin hliam a tuar a, pawikhawihtu hi police officer dangten an kap­hlum nghal a ni.

Pawikhawihtu hian police officer-te a beih lai hian, ‘Hei hi Syri tan a ni’ tiin a au nia sawi a ni. Interior Minister Gerard Collomb chuan police officer-te beitu hian Algerian student identification card a keng niin a sawi a, he thil thlengah hian thurualpui a nei em tih chhui mek a nih thu a sawi.

He thil thleng vang hian cathedral leh a chhehvel chu khar nghal a ni. Notre Damme Cathedral hi kumtin khualzin tam takin an tlawh ṭhin a ni.

Thawhlehnia thil thleng hi thla hmasaa France president thar atana Emmanuel Macron thlan tlin a nih hnua pawikhawihna a thlen ṭum khatna a ni. Kum 2015 aṭang khan France ram chhung hmun hrang hrangah firfiakte pawikhawihna thleng avangin mi 230 an thi tawh a ni. Khualzinte tlawh ṭhin hmun lar tak tak te, sorkar building leh hmun pawimawh dangte chu sipaiten an veng reng a ni.

Pawikhawihna a thlen lai hian cathedral chhungah hian khualzin tlawhtu eng emaw zat an awm a ni.