Thla 4 chhungin Russia mi 40,000 dawn thi tawh : Zelenskyy

Ukraine president Volodymyr Zelenskyy chuan Thawhlehnia an ram mipuite hmaa thuchah a sawinaah, February thlaa Russia-in Ukraine a run hnuah thla li chhungin Russia service member 40,000 dawn an thi tawh tih a sawi.

President Zelenskyy chuan, "Thla li chhung chu Russia state chuan a ram mipuite hnenah chanchin engmah, an ram luaha an sipai thi zat pawh an sawilang lo a ni. A ngawi tlat a, political leh military level interview leh thusawinaah pawh engmah a sawichhuak duh lo a ni," a ti.

Indonaah hian Russia sipai tam tak an thih bakah, mi sang telin hliam antuar a, ramtui leiloa awm tam tak an awm bawk a ni, tiin Ukraine President chuan a sawi. Russia official-ten indonaa an sipai thi zat an puangzar duh lo a nih chuan, Russia official-te nena inkungkaihna neihte chuan a thusawi chu lo hrilh chhawng turin Zelenskyy chuan a ti bawk a ni.

Zelenskyy hian Russia mi thi zat an lakna ber hi a sawilang lo a, hetih lai hian Ukraine-a Russia mi thi zat hi a sawi ai hian an tlem zawk niin midangte chuan an chhut thung.

Russia independent media outlet, Mediazona chuan indona thlen hnua Russia sipai thi zat hi 4,760 niin a sawi. Russia Defence Ministry chuan ṭum hnih chauh mitthi zat report a puang a, March thla khan mi 498 leh 1,351 niin a puang.