Sri Lanka-ah Gotabaya Rajapaksa a kir leh beisei

Sri Lanka president hlui Gota­baya Rajapaksa chu an ram tlan­chhuahsana Singapore a pan hnuah, an ramah hian a kir leh an beisei tih Sri Lanka lawmaker pakhat chuan a sawi.

Cabinet thu­puangtu Bandula Gunawardena chuan Thawhlehnia chanchinthar lakhawmtute a kawmnaah, Rajap­saka hi a biru a ni lo a, mahse a rawn let hun tur erawh an la hre thei lo tih a sawi a ni.

Sri Lanka-in economy lama harsatna nasa tak an tawh avanga mipuiten lungawi lohna an lantir hnuah Rajapaksa hian an ram hi a chhuahsan. Sri Lanka mipuite chuan kum tamtak hnua an economy tlakchhiat chhanah Rajapaksa leh a kaihhruai sorkar chu an puh a ni.

Rajapaksa hian July 13 khan an ram chhuahsanin Maldives a pan a,a nupui leh bodyguard pahnih a hruai. July 14 khan Singapore a pan leh a ni. A thlen aṭanga rei loteah President a nihna aṭanga banna a thehlut a, July 15 khan Sri Lanka cabinet chuan an pawmsak a ni. A thlaktu tur atan hian a thawhpui hnai tak Ranil Wickremesinghe chu thlan niin, lakluh a ni tawh.

Singapore sorkar chuan Rajapaksa hi an rama ni 14 chhung awm phalna a pe a, a hnuah ni 14 dang a pawhsei sak leh bawk.

Rajapaksa hi Sri Lanka-ah a kir leh beisei a nih rualin, President a nih tawh loh avangin an ram a kir rual hian thubuai siamsak theih reng a ni tawh dawn a ni. Hei vang hian ṭhenkhat chuan Sri Lanka pan loin, UAE lamah a kal zawk an rin thu an sawi.