Hri leng thawhhnihna A thlen lohna turin fimkhur a la ṭul: Kristalina Georgieva

Khawvel pumah Covid-19 hri kai enkawl dam tawh tam chho zel mah se, hri leng hi a thawh hnihna a thlen loh nan ram hrang hrangte kan la fimkhur a ṭul hle a ni, tiin International Monetary Fund (IMF) managing director Kristalina Georgieva  chuan a sawi.

"Ram ṭhenkhatah chuan Covid-19 hri leng hi an thunun chho ṭan mek a, hei vang hian economy-te pawh hawn chhoh leh mek a ni. Hetih rual hian hri leng mah se ram economy-in a tuar avanga economy hawng an awm belh zel a, hri leng thawh hnihna a thlen palh theih thilah kan in ven fimkhur a ngai a ni," tiin Group of 20-a finance minister leh central bank governor-te nen virtual meeting an neihnaah Georgieva chuan a sawi a ni.

Georgieva chuan US dollar trillion 11 chu hri leng vanga chhiatna nasa tak an tawh theihna laka chhanna tur atan G20 ramte chuan an thawh khawm a, heng pawisa te hi a ṭul anga hman a nih thu a sawi. Hri leng vangin ram ṭhenkhatte chuan pawisa an puk a, hei hian leiba a tih tam theih thu leh he hri leng vang hian hna chan an awm thu te, hna chante zinga an hna ngai thawk thei tawh loh tur an awm thu te a sawi bawk. 

Heng hna chan te hi chhanchhuah an ngai a, hri leng hian retheihna leh inthluktlan lohna a thlen mek niin Georgieva chuan a sawi a, hengte avang hian policy ṭha tak duan a ngaih thu a sawi. IMF chuan June thla khan kum 2020 khawvel gross domestic product (GDP) ṭhanna rate tura an rin chu 4.9% a nih thu a tarlang a, Covid-19 hri leng vang hian ram hrang hrangten sumdawnna kawngah leh hmalakna hrang hrang an thawk ṭha hlei thei lo a ni. Nakkum lamah khawvel economy hi a ṭhan chho leh beisei a ni a, global GDP pawh 5.4% beisei a ni.