US-ah ni khatah hri kai thar mi 67,000 chuang awm
US-ah hripui lengin ziaawm lam a pan thei lo a, Nilaini khan hri kai hmuh chhuah thar mi 67,632 an awm. Ni 10 kal ta chhung khan nitin hri kai hmuh chhuah thar hi 55,000-65,000 inkar an la tling ziah a ni.
Texas leh Oklahoma state-ah chuan hri kai an pung chak zual. Texas-ah hri kai hmuh thar 10,791 awmin mi 110 in an thihpui a, hemi ni vek hian Oklahoma-ah pawh hri kai hmuh thar 1,075 awmin mi 47 in an thihpui bawk. State dangah pawh hri leng hian zual lam a la pan mek zel a ni.
Khawvel puma hri kai hmuh chhuah tawh hi mi 1,37,14,771 an tling tawh a, an zinga 5,87,231 in an thihpui tawh a ni. US bikah hri kai hi mi 36,17,408 an awm tawh a, an zinga 16,46,128 chu dam tawhin, thihpui mi 1,40,150 an awm tawh bawk.