Myanmar sipai thlawhtheihna a tla

Myanmar Air Force thlawhtheihna, Sahanxi Y-8 chu chin hriat loha a awm hnuah Andaman Sea-ah a tla hmuh a ni a, he thlawhtheihnaah hian mi 122 an chuang a ni.

Y-8 transporter aircraft hi Nilaini khan Myeik aṭanga Yangon panin a thlawk a, thawktu 16 bakah sipai leh an chhungte mi 106 an chuang a ni. A thlawh chhuah aṭanga darkar chanve hnuah biak theih lohin a awm a, chin hriat loha hun eng emaw chen a awm hnuah nimin zing khan Andaman Sea-ah thlawhtheihna tla them ṭhenkhat hi hmuh a ni ta a ni.

Thlawhtheihna-a chuangte hi an chanchin kimchang hriat ala ni lo a, nimin khan ruang ṭhenkhat chu hmuh a ni tawh. He thlawhtheihna-a chuangte hi an thi vek a nih chuan Myanmar rama thlawhtheihna-a chetsualna thleng rapthlak ber a ni ang.

Chetsualna thlen chhan hi hriatchian a ni lo a, a chetsual hma hian ṭanpui an ngaih thu emaw engmah an sawilan hriat a ni lo. Myanmar-ah hian fur lai ni mah se, Nilaini hian thlawhtheihna tana harsatna siam thei khawpin khua a chhe lo nia tarlan a ni bawk.

Air Force thlawhtheihna tla hi nikum March thlaa China hnen aṭanga an lei a ni a, sipaite chhinchhiah danin darkar 809 chiah ala thlawk a ni. Sipaite chuan pilot Lieutenant Colonel Nyein Chan hi tawnhriat nei ṭha tak, darkar 3,000 chuang zet thlawhtheihna lo khalh tawh a nih thu an sawi bawk.