North Korea-in anti-ship missile enchhin leh

North Korea chuan nimin khan an ram khawchhak lam tuipuiah anti-ship cruise missile eng emaw zat a enchhin leh niin, South Korea chuan a sawi.

Nimina missile enchhin hi short range ‘surface-to-ship’ missile a ni a, Wonsan khaw bul aṭanga kahchhuah niin, km 200 vel an thlawh hnuah tuipuiah an tla a ni. Nimina missile enchhin hian UN Security Council resolution a kalh lo nia sawi a ni thung. UN hian ballistic missile lam enchhin chauh a khapsak a, tuna mi erawh hi chu anti-ship cruise missile a ni.

Anti-ship cruise misile hi guided missile niin, tuipuiah chauh hman theih a ni. Kum 2012 khan North Korea hian hetiang ralthuam, Styx tia hriat lar hi eng maw zat a lo pholang tawh bawk.

South Korea sipai thupuangtu Roh Jae-cheon chuan Nkorea chetdan chu indo lawng liante lo beihna tura a theihna a lantir tumna niin a sawi. Hemi a en­chhin chhan chu tunhnaia South Korea rama US leh SKorea sipaiten nunchan an zirho chhan letna niin a sawi a, ram pa­hnih sipaiten nunchan an zirhonaah hian thlawhtheihna phurtu lawngliante pawh hman tel a ni.

SKorea President Moon Jae-in chuan North Korea in cruise missile a kahchhuah avangin nimin khan security council meeting a ko nghal. Hei hi SKorea president thar hnuaia security council meeting neih hmasak ber a ni.