China GDP ṭha chho leh

Khawvela economy lian ber dawttu China chu Covid-19 hri leng vanga an ram economy tlakhniam hnuah, April, May leh June thlaa an gross domestic product (GDP) chu 3.2% in a ṭhang chho leh a ni.

Refinitiv chuan heng thla thum chhunga China GDP ṭhanna hi 2.5%   a beisei thu a lo tarlang tawh a ni. Covid-19 hri len ṭanna ram China hi hri leng vangin January, February leh March thla khan an ram economy pawh a chhe hman hle a, an GDP tlak hniamna pawh first quater-ah 6.8% a ni hman. An ramah hian hri leng la reh lo mah se hri hi an thunun theih chhoh tak avangin inkhuahkhirhna hrang hrang khauh taka an hman te chu an thlahdul chho tawh a, hna pawh thawk chho leh tawhin hengte avang hian tun thla thum chhung khan an GDP chu a ṭhan chhoh phah leh ta a ni.

May thla khan China chuan kumin atana  economic growth goal an siam loh thu a puang a,  kum 1990 hnua a vawikhatna atana GDP target an neih loh ṭum  khatna a ni a, hei hi an rama hri leng vang a ni.