Spain-in Covid-19 vanga thite hriatrengna hun hmang
Spain chuan an rama Covid-19 leng vanga thi, mi 28,400 te hriatrenga hun nimin khan a hmang a, EU leh World Health Organisation (WHO) hruaituten an hmanpui.
Europe ram zinga hripui leng tuar hmasa leh nasa ber zinga mi, Spain ramah hian hri lengin ziaawm lam a pan tawh avangin kar thum liam ta aṭang khan inkharkhipna te pawh hlih a ni a, khuahkhirhnate pawh thlahdul chhoh zel a ni.
Nimina hripui vanga thi te hriatrengna hun buatsaih hi EC Council head Charles Michel, European Commission president Ursula von der Leyen, European Parliament leader David Sassoli bakah WHO chief Tedros Adhanom Ghebreyesus-ten an hmanpui.
Spain sorkar chuan May thla tawp lam khan hripui vanga thi te sunna hun ni 10 chhung atan a lo puang tawh bawk. An rama hri a len hnuah, prime minister Pedro Sanchez chuan March 14 khan emergency a puang nghal a, ram hrang hrang zinga lockdown kalpui khauh ber zingah a tel a ni. Inkharkhipna hlih a nih hnuah, hri kai hmuh thar hi la awm tho mah se, khuahkhirhna kalpui a ngai tawh lo a, thuneitute lamin hri darh tur ven hna hi an thawk thei tawh niin deputy PM Carmen Calvo chuan a sawi.