Britain parliament inthlanah majority nei pha awm lo

Britain parliament-a House of Commons member tur 650 thlanna, Ningani-a neih takah majority hmu pha an awm lo.

Rorellai, Prime Minister Therera May-i kaihhruai Conservative Party chuan seat 650 aṭangin seat 314 an la a, eptu pawl Jeremy Corbyn kaihhruai Labour Party chuan seat 266 an la. Majority nei tur chuan seat 326 neih phak a ngai a ni. Party lian pahnihten sorkarna siam tura seat hmuh ngai zat an hmuh phak lawh loh avangin party tenau zawkte thawhpui a, ṭangrual sorkar an siam a ngai dawn ta a ni.

Prime Minister May-i chu England chhimchhak lam, Maidenhead bialah thlan tlin a ni. May-i chuan an ramah boruak ngelnghet a awm an mamawh tih sawiin, hei hi an party chuan a pe thei dawn tih a sawi. Hetih lai hian eptu hruaitu Corbyn chuan May-i hi PM a nihna aṭanga bang turin a phut thung.

Corbyn chuan May-i kaih­hruaina hnuaiah Conservative chuan an seat leh vote eng emaw zat an hloh a, mipuite rinna pawh an hloh tawh a ni, a ti.

May-i hian European Union aṭang Britain inlakchhuah tuma hma an laknaah, an party dinhmun sawhngheh tumin kar sarih liamta khan rin lawk lohin inthlanpui neih tur hi a puang a ni. Mahse parliament-a an seat neih zat, seat 331 chu an pha dawn ta lo a ni. Majority an neih phak tak loh avangin Brexit kalpui pawh a hautak chhoh hle rin a ni.

Ṭangrual sorkar a din hma chuan May-i hian prime minister dinhmun hi ala chelh chhunzawm dawn a ni.