Juda-te in sak chhunzawm tum
Israel chuan Palestinian ram a luahsak, West Bank-ah Juda te chenna turin in 3,000 chuang sak belhna turin ruahmanna a siam.
US President Donald Trump chuan Palestinian rama in sak tum hian Israel leh Palestinian inkara remna siam tuma hmalakna chu a tibahlah niin a sawi a, hei vang hian Israel sorkar hnenah pawh he project hi kalpui rih lo turin a lo ngen tawh a ni.
Israel sorkar hian thla hmasaa President Trump-a’n Israel leh Palestinian a tlawh hnuah Palestinian rama in sak tum thu a puan lehna hmasa ber a ni. Trump hian Israel leh Palestinian aiawhte chu inremna kawng zawnga inbiakna dawhkan kil turin a nawr mek a ni. Hetih lai hian Palestnian lam chuan Israel-in a ram luah china Juda-te tana in sak a kalpui hi a tihtawp phawt loh chuan inbiakpui an tum loh thu an sawi.
Trump chuan Israel Prime Minister Benjamin Netanyahu chu in sak project chawlhsan rih turin a lo ngen tawh a, mahse in sak chhunzawm tur hian Juda hruaitute chaun PM hi an nawr ve reng thung.
West Bank-ah hian Israel mi 600,000 chuang an cheng mek a ni. International law hnuaiah Palestinian rama Israel mite tana in sak sak hi dan kalh nia ngaih a ni a, hei hian Palestinian independent ram din tuma hmalakna pawh a dal nia sawi a ni.