Ram ṭhenkhatin khuah-khirhna an kalpui ṭha leh

Ram eng emaw zatin hripui leng vanga in­kharkhipna an kalpuite an thlahdul hnuah, hri leng hian ziaawm lam a la pan theih loh avangin kharkhipna an kalpui leh hlawm a, ramri-ahte endikna an siam ṭha leh. 

Greece chuan Bulga­ria aṭanga lutte chu a hma darkar 72 chhunga pek chhuah, coronavirus test negative result awm­na keng tel turin a ti. Hei hi tunhnaia an rama khualzin lut zingah Covid-19 kai hmuh an awm belh zel vang a ni. 

Australia-a khawpui lian ber dawttu, Mel­bourne leh a chhehvel bialah pawh  hri darh tur venna atan kar ruk chhung lockdown puan a ni bawk. 

Serbia ramah mi 10 aia tam punkhawm khap a ni a, pawn chhuahnaah leh vantlang hmunah te mask vuah vek tur leh, dawr leh bus station-ah pawh meter 1.5 inkar hlata awm vek tura tih a ni. Hong Kong-ah Nilaini aṭang khan pawn lamah mi pali aia tam awmkhawm phal a ni lo a; gym, karoake bar leh sumdawnna hmun ṭhenkhat chu kar khat chhung khar tura tih an ni leh bawk. 

Israel-ah pawh khuah­khirhna siam ṭhat leh niin; live show venue, bar leh club te khar a ni a, an rama hrileng chuan ziaawm lam a pan loh chuan ram pumah inkharkhipna kalpui a ngai leh dawn tih official-te'n an sawi. 

South Africa-ah hri leng avangin zu zawrh khap a ni a, zan lamah curfew puan a ni bawk. Zu kaihhnawiha harsatna nei damdawiina lut leh enkawl ngai an tam a, hri kai enkawl ngai an pung zel bawk a, hei vang hian damdawiin lam indaihlohna te a ziaawm theihna turin zu zawrh hi khap rih a ni. April leh May thlaa zu zawrh khap a nih lai khan zu kaihhnawiha buaina nei, damdawiin pan ṭhin chu 60% dawnin an tlahniam hman a ni.