Bitcoin scam US mi pawimawhte Twitter account hack a ni

United States-a mi challang tak tak Twitter account chu Nilaini zanah khan hack a ni a, he thil thleng hi Bitcoin scam tiin a hming an vuah a, sorkar mi pawimawh tak tak bakah sumdawng leh milar account-te chu hacker-te hian an hack sak a ni.

Twitter account hack-tute hian verrified account, follower ngah tak takte account hack-in an hmingin tweet an siam a, an tweet siamah hian, "A hnuaia address tarlanah hian Bitcoin in thawn a nih chuan a let kan thawn let leh ang che u! $1,000 in thawn chuan $2,000 kan thawn let leh ang che, Minute 30 atan chauh a ni hei hi," tiin mi pawimawh tak tak, awihawm tur tak tak chu tweet an siam sak a ni. 

Hacker-te'n account an hack sakte hi US bakah khawvel huap pawha mi lar tak takte an ni hlawm. Chung zingah chuan khawvela mi hausa ber pawh lo ni tawh ṭhin Bill Gates, entreprenuer turu leh NASA meuh pawhin an thawhpui Elon Musk, US president hlui Barack Obama, media tycoon Mike Bloomberg, Democrats hotupa Joe Biden, rapper Kanye West leh a nupui Kim Kardashian West, Investor lar Warren Buffet, Amazon neitupa leh khawvela mi hausa ber Jeff Bezos, Apple corporate account leh Uber corpo­rate account-te pawh a tel.

Twitter chuan Bitcoin scam chu an chhui zui nghal tih sawiin, an hmalakna hmasa ber atan chuan khawvela verified account zawng zawng deuhthaw an block nghal phawt a, mahse a hnu lawkah heng account an block-te hi hman theihin an siam lehnghal. Mahse account eng emaw zat chu an la block a, a hima an hriat hnuah heng account an la hren te hi chu a pangngaiin an kaltir leh dawn chauh a ni.

An buaina tawh chu 'coordi­nated social engineering attack' lanchhuahna a ni tih sawiin, an hnathawk an internal system leh an hmanrua khawih theite bitumna niin an sawi bawk. Twitter hian hacker-te post siam hi an paih nghal vek a, Twitter chief executive Jack Dorsey chuan pawi an tih thu leh ni harsa tak an hmachhawn tih a sawi a ni. 

Twitter lam hian password reset dilna te pawh an hnawl nghal a, mahse nimin lam aṭang kha chuan verified account neite pawhin tweet an siam leh thei tawh a, social media giant lam chuan an buaina tawh chu siam ṭha turin hma an la la reng tih an sawi a ni.

Report ṭhenkhat chuan he thil thlengah hian Twitter insider-ten mawh an phur niin an tarlang a, mahse finfiahna erawh engmah a awm lo. 

Tweet zawng zawng hian Bitcoin address pathum zinga pakhat an inṭawm vek a, he account hi pawl pakhat Crypto­ForHealth account a ni. BBC report-in a tarlan dan chuan tweet ṭhenkhat web address chu cyber-atacker pakhat email address ‘mkworth5@gmail.com'-ah a in register vek tih sawiin he email neitu profile hming chu Anthony Elias tih a nih thu an tarlang. Cryptoforhealth pawh hi Instagram-ah an awm ngei tih tarlangin an profile description-ah pawh, "It was us" tih an ziak a, mahse tunah chuan an biak pawh theih tawh lo niin an tarlang. 

Blockchain.com hmanga  Bitcoin address share an enfiah hnuah hacker-te hnenah hian nimin thleng pawh khan transaction 373 lai a awm hman a, hemi hmang hian Bitcoin 12.86252562 lai an dawng hman. Chu chu $118,300 vel hu a ni a, India pawisa chuan Rs nuai 89 hu vel a ni. 

Heng pawisa tam ber hi US aṭanga an hmuh a ni a, hmun lia ṭhena hmun khat chu Europe aṭangin a nih laiin Asia khaw­mualpui aṭang pawhin mi eng emaw zatin an pe hman.