Britain PM-in sorkar thar siam dan ngaihtuah mek
Britain Parliament inthlan neih zawh takah party mala sorkarna siam thei tura chak an awm lo a, hei vang hian Prime Minister Theresa May-i chuan ṭangrual sorkar siampui tur a ngaihtuah mek.
Theresa May-i chuan Northern Ireland party, Democratic Unionist Party (DUP) chu sorkar siampuiah sawmin inbiakna a neihpui mek.
Parliament inthlan neih zawh takah khan May-i party, rorellai Conservative Party hian seat 650 aṭangin seat 318 chiah an la pha a, majority nei tura seat neih ngai zat seat 326 an hmu pha lo a ni. DUP hian seat 10 an lain, eptu pawl Labour Party chuan seat 262 an la a ni.
May-i hian European Union aṭanga Britain inlakchhuahna tur, Brexit chu chak zawka kalpui a nih theih nan sorkar chak zawk siam beiseiin rin lawk lohin Parliament inthlan neih tur hi a puang a, mahse an party hian an seat neih sa zat pawh an hum zo ta lo a ni.
May-i leh DUP-te hian a thuphung chuan thawhdun an remti tawh a, tunkar chhungin inremna hi an tihfel theih beisei a ni. May-i hian Zirtawpni zan khan Britain lalnu, Queen Elizabeth II pawh hmuin, DUP nena ṭangrual sorkar an siam theih tur thu hi a hrilh tawh nia sawi a ni.