Philippines-ah sipai leh firfiakte inbei chhunzawm

Philippines chhim lam bialah sipai leh firfiakt pawlte an la inbei chhunzawm zel a, US sipaite chuan Philippines sipaite puiin Marawi khuaah Zirtawpni khan bomb an thlak.

Philippines sipai thupuangtu chuan firfiakte kut aṭanga Marawi khua laklet tumin kar thum beihpui an thlak tawh tih sawiin, a kar thumnaah US sipaite hian an puih thu a sawi.

US hian khawmual sipai tir loin, thlawhtheihna leh khawpui chhung enthlithlaina kawngah a pui zawk nia sawi a ni. Philippines-a US embassy chuan Philippines sorkarin a ngenna angin an pui tih a sawi.

Philippines chhim lama awm Marawi khawpui hi Islamic State (IS) firfiak pawl zawmpui, Abbu Sayyaf leh Maute firfiak pawlten an awp a, he khawpui lak let tum hian sipaite hian beihpui an thlak mek a ni. Sipai leh firfiakte inbeihnaah hian mi 138 an thi tawh a, an zingah hian civil mi 38 leh sipai 58 an tel. Firfiakte leh sipaite inbeihna avang hian President Rodrigo Duterte chuan chhim lam bialah hian sipai hnena thuneihna sang pekna, martial law pawh a lo puang tawh a ni.