Ethiopia mipui tana ei tur pek a zo dawn

Ethiopia ramin khaw­kheng nasa tak a tawrh avanga khawvel ram hrang hrangin an ram mipui makduai 7.8-te chhawm­dawlna tura ei tur an pek ṭhin chu tun thla thar hian a zo dawn niin, UN chuan a sawi.

Aids group leh Ethiopia sorkar chuan ṭanpuina pe tur hian ram hrang hrangte an au a, hetihlai hian khawvel hmun hrang hrangah buaina chhuak leh harsatna tawk an awm ve reng avangin ṭanpuina petu pawh hi an tlem sawt a ni.

Nigeria khawchhak lam bial, South Sudan, Yemen leh Somalia-te pawhin tualchhung buaina an tawk chho reng a, an hun tawn mek hi UN chuan kum 1945 hnuaṭam tla avanga mihringten harsatna an tawh nasat ber niin a lo sawi tawh a ni.

Hetih lai hian Ethiopia ramah hian hun rei tak chhung ruah a sur tawh loh avangin khaw kheng hian zual lam a pan zel a ni. Sorkar chuan khawkheng vanga harsatna tawkte chhawmdawlna tur hian kum hnih kalta chhung khan dollar maktaduai 381 a dah a, mahse a kum thumna atan chuan a dah chhunzawm thei tawh lo a ni.

World Food Programme hotu, John Aylieff chuan Ethiopia chu dinhmun chhe takah a ding mek tih a sawi a, mipuite ṭanpuina tura ei tur an semte chu June thla tawp hian a zo vek tawh dawn niin a sawi. Ṭanpuitu an awm thuai loh chuan mi maktaduai 7.8 tana ei tur sem ṭhin chu tihtawp a ngai dawn ta niin a sawi. Save the Children hotu John Graham pawhin ei tur sem zawh a nih hunah eng thil nge thleng zel dawn an hriat loh thu a sawi.