Libya-ah Gaddafi-a fapa chhuah

Libya ram hotu hlui, Colonel Muammar Gaddafi-a fapa, SAif al-Islam Gaddafi chu hel hoin kum ruk chhung Zintan khuaah an hren hnuin, kar kalta Zirtawpni khan an chhuah.

Muammar Gaddafi-a’n a fate zinga a aiawh tura a duh ber, Saif al-Islam Gaddafi hi a pa ro­rel­na paihthlak a nih hnu kum 2011, November thla khan man a ni. Kum 44 mi niin kum 2008 khan London School of Economics chuan Ph.D an lo pe tawh a ni. A pa rorel lai khan khawthlang ramte nena inlai­chinna siamna kawng­ah chanvo pawimawh tak a chelh ṭhin.

Kum 2011-a Gaddadi rorelna duh loa nawrh huaihawt a nih khan tha­rum thawhtute leh nawrh huaihawtte thah tirah puh a ni. A mihring puite laka pawikhawihna nasa tak thlentira puh a nih avang hian kum 2011, June thla khan International Criminal Court chuan manna tur thupek a lo tihchhuak tawh a ni.

Kum 2011 August thla khan an ram khawpui Tripoli chu sorkar laka helte kutah a awm a, hemi hnu hian Bani Walid-ah a tlanchhia a, November thla khan Niger-a a tlan­chhia chu helho hian man­in Zintan-ah an tantir zui ta a ni. Kum 2015, July thla khan a chungthu rel a ni a, thi tura hremna pek a ni. Mahse Libya sorkar chuan ngaidamin a chhuah zalen ta a ni. Chhuah a nih hnu hian Badya-a a chhungte hnen lam a pan nghal nia sawi a ni a, mpiui hmuhah erawh a la inlan lo.