France inthlanah Macron-a party che ṭha

France Parliament inthlanpui neih zawh takah President Emmanuel Macron-a party, La Republique en Marche (Republic on the Move) an che ṭha hle a, an thawhpui MoDem nen National Assembly-a seat 577 aṭangin seat 445 an la pha dawn niin a lang.

Inthlan result kimchang hi June 18-a inthlan thawh hnihna neih hunah a chiang ang. Emmanuel Macron-a party, LREM hi nikuma din chauh kha a ni a, an party candidate zinga tam tak hi politics lama tawnhriat la nei lo an ni. Pathianni-a inthlan thawh khatna neiha vote tlate chu chhiar an ni tawh a, LREM leh MoDem-te hian vote tla aṭangin 32.3% an la pha a ni.

Centre-right Republican chuan 16% an la a, Socialist party chuan 7.4% chauh an la pha. Far-right National Front (FN) chuan 13.2% lain, far-left France Unbowed chuan 11% an la pha bawk.

Macron-a party, LREM hian tun ṭum hi party hminga inthlanpui an hmachhawn ṭum khatna a ni a, candidate 428 siamin an zingah hian hmeichhia 214 an tel.

Hetihlai hian Inthlan thawh khatnaah hian vote a tla ṭha lo hle a, vote 48.7% chauh a tla a ni.

France electoral rule hnuaiah, inthlan thawh khatnaa candidate zinga vote tla aṭanga 50% hmu pha chin chuah chu tlinga ngaih an ni. 50% hmu pha lo, 12.5% vote hmu pha chinte chuan Pathianni lo awm leh turah khian inthlan thawh hnihna hi an hmachhawn leh ang.