Iran-in Qatar tan ei tur thawn lut

Gulf ram ṭhenkhatten Qatar ram nena an inzawmna chhu chat a, an inkalpawhna te an khar hnuin Iran chuan Qatar tan hian ei tur phurtu thlawhtheihna panga a tir lut.

Qatar-in ei tur a lakluh zing­a 40% thawntu, Saudi Arabi chuan Qatar nen khawmual lama an inkalpawhnate a khar vek a, hei vang hian Qatar ramah hian ei tur indaih lohna a awm chho ṭan nia sawi a ni. Mahse Iran chuan an harsatna chinfel pui dan ngaihtuah hian thlawhtheihna hmangin ei tur a thawn lut a, thlawhtheihna pakhat hian ei tur ton 90 vel zet an phur a ni.

Iran Air thupuangtu, Shahrokh Noushabadi chuan Qatar-in a mamawh chhung chuan ei tur hi an thawn luh chhunzawm zel tur thu a sawi.