Panama Paper case : Panel hmaah Pakistan PM inlan dawn

Pakistan Prime Minister Nawaz Sharif-a chu Panama Paper leak-ah ram pawn lama sum chheprelh zingah a hming a lan avangin hemi chhuina kalzelah, June 15 hian Joint Invetigatin Team (JIT) hmaah a inlan dawn.

Sharif-a hi Pakistan Prime Minister ṭanglai zingah investigating agency hmaah thu zawhfiah tura inlan hmasa ber a ni ang. June 8 khan JIT hian Sharif hi JIT office, Islamabad-ah inlan turin a lo ko tawh bawk.

PM hnena kohna an pekah hian Panama Paper case kaihhnawih document leh hmanraw dangte keng turin an hriattir bawk. Sharif-a thu an zawhfiah hmain JIT hian Finance Minister Ishaq Dar pawh thu an zawt dawn a ni. June 2 khan Sharif-afapa, Hassan Nawaz chu JIT hmaah hian a lo inlan tawh bawk.

Panama Paper leak aṭanga a landanin, Sharif-a hian kum 1990 chhoa prime minister a nih lai khan London-ah hmun pahnih a lei a, ram pawn lamah sumdawnna hmun a nei bawk nia tarlan a ni. Ram pawn lama hmun leh company a neihte hi a puangzar lo a, an chhungkaw thil neih tarlanah pawh an tarlang tello a ni. An chhung hminga company an neihte chu Bri­tish Virgin Islan-a Nescoll Lt, Nielsen Enterprises Ltd leh Hangon Property Holdings Ltd-te an ni. Hei bakah hian London-a Mayfair area-a Park Lane-ah apartment te a nei tel bawk.

Sharif leh a chhungte chuan ram pawn lama an thil neih chungchangah tih dik loh engmah an nei lo tih an sawi a, London-a an hmun lei chu Qatari chhungkaw company-a investment tih aṭanga an neih niin an sawi bawk.