Israel-in Palestinian refugee agency tihtawp duh

Israel chuan United Nations agency, Palestinian raltlante chhawmdawlna pe ṭhin, United Nations Relief and Works Agency (UNRWA) chu tihtawp a duh thu a awi.

Israel Prime Minister Benjamin Netanyahu chuan UNRWA hi Israel huatna thehdarh ṭhinah puihin, tihtawp a duh thu hi UN-a US ambassador hnenah a hrilh a ni. Israel ram ṭhian ṭha US hi nikum chhung khan UNRWA donor ram lian ber niin, dollar maktaduai 368 a thawh a ni.

Netanyahu chuan UNRWA chuan buaina chinfel aiin a ti punlun zawk niin a sawi a, hei vang hian UNRWA tihtawp hi a hun tawh a ni, a ti. Hemi chungchang hi UN-a US ambassador, Nikki Haley nena meeting an neihṭumin a hrilh thu a sawi.

UNRWA hi kum 1949 khan UN General Assembly chuan Palestian raltlante leh an ram aṭanga hnawh­chhuahte ṭanpuitu turin a din a ni. He agency kal­tlang hian Middle East-a Palestinian raltlan inziak lu mi makta­duai nga te chu ṭanpuina pek mek an ni.

Hetih lai hian UNRWA thupuangtu, Chris Gunness chuan agency kalphung chu General Assembly-a majority vote hmang chauhin thlak danglam theih a nih thu a sawi.