Europe leh America-te'n Monkeypox an tuar na ber: WHO

World Health Organization (WHO) Director General Tedros Adhanom Ghebreyesus chuan Nilaini khan Europe leh America chu monkeypox tuar na ber an nih thu a sawi.

Heng khawmualpui pahniha monkeypox vei awm zat hi khawvel puma he hri kai awmzat aṭanga 95% lai a nih thu a sawi bawk. Ram 78 aṭangin monkey­pox case 18,000 vel report a ni tawh a, chuta ṭanga 70% chuang chu European region aṭangin a ni a, 25% chu America aṭangin a ni bawk, a ti.

Case an chhinchhiah tawh aṭanga 98% lai chu mipa leh mipa inpawlna aṭanga kai an nih thu a sawi a, mipa mahni anpui kawp ṭhinte pawh an mi kawp ṭhin titlem turin a chah nghal bawk. "Covid-19 chungchangah thu dik lo thehdarh a ni tih kan hre vek tawh. Online-in thu dik tawk lo hi nasa takin a darh thei si a, chuvang chuan social media platform kan tih te, tech company leh news organization-te pawh thu dik lo thehdarh a nih lohna turin an thawh a ṭul a ni," tiin a sawi bawk.

Monkeypox hi Inrinni liam ta khan WHO chuan public health emergency of international concern (PHEIC)-ah a lo puang tawh a, ram hrang hrangte chu he hri leng hi la thutak turin a lo ngen tawh bawk.

Canada, European Union leh US-te chuan monkeypox vaccine atan hian MVA-BN (Modified Vaccinia Ankara - Bavarian Nordic) chu an pawm tawh a, heng bakah hian vaccine dang pahnih pawh an enchhin mek a ni. Mahse WHO lam erawh chuan heng vaccine-te hi a thawh dan data an la neih ṭhat tawk loh bakah a dose tur an la hriat chian theih loh avangin mi nawlpui lak atan erawh an la 'recommend' chiah loa, heng vaccine hmang tawh ramte chu an data neih dan hrilh ve turin a ngen bawk a ni.

Thawhlehni thleng khan Canada pawhin monkeypox case hi 745 an nei tawh tih Public Health Agency of Canada (PHAC) chuan Nilaini khan an puang.