Panama-in Taiwan nena inzawmna chhu chat

Panama chuan hun rei tak Taiwan nena inzawmna ṭha tak an neih ṭhin chu chhu chatin, China chu inlaichinna a siampui zawk.

Panama sorkar chuan China-in China ram pakhat chauh a awm a, Taiwan chu China ram peng ami tia a sawi chu a pawm tih a sawi. He thil vang hian Panama chungah Taiwan a lungawi lo hle a ni.

China chuan Taiwan hi a ram peng pakhat, China aṭanga inlakhran tumah a puh a ni. Taiwan nena inzawmna siam hi tunah chuan ram 20 chauh an awm tawh a, nikum December thla khan Africa ram, Sao Tome and Principe chuan Taiwan nena an inzawmna hi a lo chhu chat ve tawh bawk a ni.

Taiwan foreign ministry chuan thuchhuah siamin, Panama chungah chuan an lungawi lo hle tih a sawi a, kum tam tak an lo inṭhianṭhat tawhna chu haiderah a puh. Nikum June thla khan Taiwan president Tsai Ing-wen chuan Panama hi tlawhin, Panama President Juan Carlos Varela nen pawh meeting an lo nei tawh a ni.

Panama-in Taiwan nena an inzawmna a chhut chah thu a sawi hnu lawk hian China foreign minsitry chuan thu­chhuah siamin, Panama duhthlanna siam chu lawm taka an lo pawm thu a sawi. China state media chuan Panama leh China-i inpalai tawnna tura inremna thu­thlung an ziak lai thlalakte an thehdarh ve nghal bawk.