Yemen-ah cholera vanga thi 923 an tling tawh

Yemen rama tuihri, cholera leng vanga thi chu kumin April 27 aṭang khan mi 923 an tling tawh niin, World Health Organization (WHO) chuan a sawi a, he hri vei hi mi 124,000 an tling tawh bawk a ni.

Kar kalta Ningani khan cholera vanga thi zat record hi mi 789 an ni a, Thawhṭanni khan data thar ber hi tichhuak lehin ni li chhungin mi 134 an thihbelh hman a ni. Cholera vei pawh hi an pungchak hle.

United Nations Childrens’ fund (UNICEF) chuan Yemen rama cho­lera leng mek vei zat hi karhnih chhungin mi 130,000 an tlingchho thei dawn niin a sawi a, thla ruk hnuah chuan mi nuai thum an tlin a rin thu a tarlang.

Cholera hi April 27 aṭang khan Yemen rama rambial 22 zinga 20-ah chak takin a darh a, an ram mipui hmun thuma ṭhena hmun hnih, mi maktaduai 19 vel chu inven ngaiin an awm mek a ni. Tualchhung indona a awm reng bawk avangin mipuiten harsatna an tawk nasa hle a, mi maktaduai 10.3 chu ṭam hmabakin an awm a, mi maktaduai 14.5 chuan tui thianghlim an tla­chham tawh a ni.

Ram chhunga hospital awm zinga 45% velin hna an thawk a, mahse heng hmunah pawh hian damdawi leh hmanruate bakah staff pawh an indaih lo hle.