London-a Grenfell Tower a kang

London khawthlang lam, Lancaster West Estate-a apartment building, Grenfell Tower-ah nimin zing khan kangmei nasa tak a chhuak a, mi 30 chu meikhu an hip luh nasat avangin damdawi-inah dah luh an ni.

Grenfell Tower hi chhawng 27-a sang a ni a, an ram huna nimin zing dar 1.16 vel khan police-te chuan kangmei chhuah thu hi report an dawng a ni. Tower chhawng hnihna aṭanga a chunglam zawngah kangmei hi a darh a ni. He tower-ah hian chenna-in, flat 120 a awm a ni. Tower kang hi ṭhelh nghal a ni a, nimin chawhnu lam thleng khan ṭhelh mih ala ni lo.

Kangṭhelh hna thawk tur hian kangṭhelh motor 40 leh kangṭhelhtu 200 tirh an nih thu London Fire Brigade chuan a sawi. Nimin chawhnu lam thleng khan building chhungah hian mi eng emaw zat tang an la awm a, heng mite chhanchhuah hna hi ngawrh taka thawh a ni.

Fire Brigade chuan kangmei chhuah chhan hi hriat chian ala ni lo tih an sawi.

Grenfell Tower hi kum 1974-a Kensington and Chelsea Borough Council-in an sak a ni. Lancaster West Estate peng pakhat niin, flat 120 a awm a, mi 1,000 dawn an cheng a ni. Grenfell Tower hi pound makataduai 10 sengin kum hnih chhung thawmṭhat hna thawh a ni a, nikum khan an zo a ni.

Tower-a flat 120-te hi council aiawhin Kensington and Chelsea Tenant Management Organisation (KCTMO)-in an enkawl a ni. Council leader Nick Paget-Brown chuan building hi endik fo a ni tih a sawi.