June thla tawpah Trump leh SKorea president inhmu dawn

US President Donald Trump leh South Korea President Moon Jae-in te chu June thla tawp hian Washington-ah an inhmu dawn a, North Korea chungchang an sawidun ang.

White House chuan thuchhuah siamin, ram hruaitu pahnihte hi June 29-30 hian a inkawm dawn a, North Korea-in nuclear leh missile a siam leh a enchhin fo chungchang te, Korean Peninsula-a ram pahnihte inep dante an sawidun dawn a ni, a ti. Hei bakah hian US leh South Korea-in thawhdunna nghet zawk an neih dan turte pawh an sawidun ang.

US leh SKorea hian tunhnai khan sipaite nunchan zirho na lian ber an buatsaih a, April thla khan USS Carl Vinson nuclear aircraft carrier chu South Korea nena joint naval exercise neihna turin Korean Peninsula-ah tirh a ni.

US hian sumdawnna lama North Korea thawhpuite hrek dan tur a ngaihtuah mek niin, US Sec-retary of State Rex Tillerson chuan a sawi. He thu hi Senate Foreign Relations Committee hearing-ah a sawi a ni. President Trump-a kaihhruai sorkar chuan NKorea hian nuclear leh missile a siam chhunzawm reng avangin na zawka hrek a duh a, hetihlai hian NKorea hian US kap pha thei tur missile siam tumin a bei mek nia sawi a ni bawk.