NKorea-in America mi a man hawtir

North Korea chuan America mi, nikhaw hre loa awm mek zirlai a man chu an rama hruai haw a phalsak.

Kum 22 mi, American zirlai Otto Warmbier hi University of Virginia-a zirlai a ni a, kum 2016-a tour group-in North Korea an tlawhin a tel ve a ni. Warmbier hian an haw dawnah North Korea hotel bang aṭanga banner tar a lakthlak avangin airport-ah man a ni a, labor camp-ah hren zui a ni.

Warmbier hi nikum March thla khan a chungthu ngaihtuahin, sorkar thil ruk tumah puhin kum 15 chhung hrehawm taka tang tura hrem a ni. Hemi hnu hian a chanchin hi hriat zui a ni lo a, hetih lai hian kar hmasa lawk khan a nu leh pate chuan an fapa hi nikhaw hre loin kum 2016 March thla aṭang khan a awm tih an hre chauh niin an sawi. North Korea-a US State Deparment special envoy, Joseph Yun chuan North Korea sorkar hnenah Warmier hi enkawl a nih theih nana chhuah tura a ngen hnuah NKorea hian hruai haw hi a remti thei ta a ni.

Warmbier-a nu leh pate chuan an fapa hi a chungthu relsak a nih hnuah sleeping pill a ei avangin nikhaw hrelo hian a awm ta tih North Korea official-te'n an hrilh niin an sawi a, mahse hei hi an awih loh thu an sawi. US official pawhin Otto Warmbier hi hren a nihna hmunah hian vawi tam tak kut thlak a ni tih a sawi.

Warmbier phurtu thlawhtheihna hi Thawhlehni zan khan Cincinnati Municipal Lunken Airport-ah a ṭum a, University of Cincinnati Medical Centre-ah enkawl tura lak nghal a ni.