Bangladesh leimina thi 125 an tling tawh

Bangladesh chhim chhak biala leimin vanga thi chu mi 125 an tling tawh a, chenna-in tam tak a chhe tawh bawk.

Thawhṭanni aṭang khan Bangladseh chhimchhak lama district pathum - Chittagong, Bandarban leh Rangamati-ah nasa takin ruah a sur a, hmun tam takah lei a min bawk. Rangamati district-ah chuan lei min vang hian mi 88 an thi tawh a, Badarban-ah mi 37 ruang hmuh a ni tawh bawk.

Disaster Management Ministry official GM Abdul Quader chuan tuilian leh leimin vanga harsatna tawk mekte chhanchhuah hna hi ngawrh taka thawh a nih thu a sawi a, mi eng emaw zat chu chin hriat lohin an la awm mek tih a sawi. Chhanchhuah hna thawktu, Bangladesh Army zinga mi 10 chuangin hliam an tuar tel a ni.

Ruahsur nasain chhiatna a thlen avang hian mi tam tak chu hmun him lamah sawnchhuah an ni tawh bawk.