Sri Lanka President-in all-party govenrment siam a tum

Sri Lanka president thar, Ranil Wickremesinghe chuan a kaihhruainaa all-party government siam tumin eptu party-te inbiakna a neihpui mek. Kar khat chhungin thutlukna an siam theih beisei a ni.

President Wickremesinghe chuan Ningani khan president hlui Maithripala Sirisena party, Sri Lanka Freedom Party (SLFP) hruaitute a kawm a, inremna erawh an la siam thei lo.

Hetih lai hian eptu party lian ber, Samagi Jana Balawegaya (SJB) chuan Wickremesinghe kaihhruai sorkarah hian tel an tum ve lo tih an sawi a, mahse an party MP ṭhenkhat erawh chuan sorkar thlawp hi an duh nia sawi a ni thung.

MP Wimal Weerawansa kaihhruai National Freedom Front (NFF) chuan President Wickremesinghe hi an thlawp dawn tih an sawi. Weerawana chuan an ram tan duhthlan tur pahnih chauh a awm tawh a, an tlakchhiat zelna tur kawng nge, a tawp thlenga an buaina chinfel theih ngaihtuaha lungrual taka thawhho tih chauh a ni tawh a ni, a ti. Hei vang hian President Wickremesinghe-a'n an ram dinhmun siamṭha tura hma a laknaah, an party chuan politics lama an inhmelmanate dahṭhain, thawhpui an inhuam tih a sawi.

Minister of justice Wijeyadasa Rajapakshe chuan all-party goverment siam tur hian party zawng zawngte chu sawm an ni tih a sawi a, sorkar chuan hun eng emaw chen party-te chhanna hi a lo ngaichang dawn a ni, a ti.