US-ah political party thar a ding

US-ah Republican leh Democratic official hlui ṭhenkhatin political party thar, Forward Party an din.

Forward Party-ah hian Democratic presidential candidate hlui Andrew Yang leh New Jersey Republican governor hlui Christine Todd Whitman-te pahnih chu hruaitu an ni. An party hi US politics awptu party pahnih, Republican leh Democratic party-te thlaktu tur a nih thuai an beisei thu an sawi.

Party hruaitute hian favang chhoah khawpui hrang hrangah hun hmangin, an party thlawp turin mipuite hip khawm an tum dawn a ni. September 24 hian Houston-ah official-a an party tlangzarhna hun hi an hmang dawn a, nakkum nipuiah party national convention hmasa ber hman an tum bawk.

Centrist party thar hi political group pathum inchhunfina an din a ni a, hruaitute chuan nikuma Gallupo-in mipui ngaihdan a lakah, America mi hmun thuma ṭhena hmun khat chuan political party pathumna, third party an neih hi a ṭul tawh nia an ngaih thu an sawi a ni, an ti. Two-party system kalpuina, America-ah hian party pathum din tumna hi a lo hlawhchham fo tawh a, political analyst-te pawhin Forward party pawh hi a hlawhtlin chhoh an ring lem lo a ni.

Hetih lai Forward party chuan nakkum kumtawpah an rama state 30-ah party registration hi an neih fel a, kum 2024-ah state 50-ah an neih kim hman an beisei thu an sawi. Kum 2024 kumtawp lama President leh Congress inthlan neih turah chuh hman tura an inpeih theih an beisei a ni. Budget, USD mtd 5-in bul an ṭan dawn tih Yang chuan a sawi a, donor pawh eng emaw zat an awm nghal dawn tih a sawi bawk.