Zelenskyy-a'n Donetsk biala Civil mite inthiarchhuak turin ngen

Ukraine president Volodymyr Zelenskyy chuan Ukraine thuneihna hnuaia la awm mek, an ram khawchhak lama Donetsk region-a civil mi cheng zawng zawngte chu inthiarchhuak turin a ngen.

President Zelenskyy chuan, "Donetsk region a chengte an chhuah tam poh leh, Russia sipai­te'n mi thah tur an nei tlem tihna a ni dawn a ni," a ti. He bial hi nasa takin inbei mah se, Russia sipaite hian hma an sawn chak lutuk lo a, mahse bial chhung hmun tam zawk chu an thunun tawh thung.

"Kan hun ṭha neih zawng zawngte chu nunna tam tak chhanchhuahna atan leh Russia pawikhawihna thlen tihtlem tumin kan hmang dawn a ni," tiin President chuan a sawi.

Tun hi Ukraine thuneitute'n an awmna chhuahsan tura thupek a chhuah vawi khatna a ni tawh lo.

Donetsk-a Ukraine-in a la awp bialah hian civil mi 2,00,000 leh 2,20,000 inkar an la khawsa mek nia chhut a ni.

Sorkarin insawnchhuak tura thupek a tihchhuah rual hian, thlasik lo thlenah an dinhmun chu chhe a zual dawn a, a bikin naupangte an ngaihtuahawm dawn tih a tarlang.

Hetih lai hian Russia chuan Donetsk region-a hmun dang, Russia thlawptu inlakhran duhtu­ten an thunun meka Ukraine mi prisoners of war (POW) thih dan chu chhui chiang turin UN leh Red Cross official-te a sawm. Sipai tangte hi Olenivka tan-in beih a nih ṭumin an thi a, Ukraine leh Russia-ah hian pawikhawihtuah an inpuh tawn a ni. Hei vang hian Russia chuan heng sipai tangte thih dan chhui chian hi a inhuam reng thu sawiin, defence official-te chuan chhui chiang tur hian UN leh Red Cross lam hi an sawm a ni.