Indian Ocean-ah China rocket a tla China-in chanchin a tarlang lo : NASA

National Aeronautics and Space Administration (NASA) chuan kar liam ta Inrinni khan Indian Ocean-ah Chinese rocket a tla tih a sawi a, mahse China lam chuan he rocket keh tlem tlakna hmun leh chanchin kimchang a puanzar duh lo thung.

U.S. Space Command chuan Long March 5B rocket hi India huna Inrinni zan dar 10:15-ah Indian Ocean a rawn lut niin a sawi a, mahse hei bak a chin hi an hrechiang thei lo. Hei vang hian ram hrang hrangte chu kaihhruaina dante ṭha taka zawm a, thil keh them tlain chhiatna nasa zawk a thlen lohna tura chanchin kimchang zawkte hrilh tura an duh thu NASA administrator Bill Nelson chuan a sawi.

Washington-a Chinese Embassy chuan he thil thleng chung­changah thuchhuah an la siam lo thung. China chuan kar tir lam khan a rocket kahchhuah kehthemte hi uluk taka an chhui zui tur thu sawiin, leia awmte tan hlauhthawnna a awm loh thu a lo sawi tawh a ni.

Long March 5B hi July 24 khan orbit-a Chinese space station thar sak laiah laboratory module dah tura kahchhuah niin, kum 2020 hnua China-in rocket chak ber chi an kahchhuah hnua vawi thum an kah chhuahna a ni.