US leh Qatar-te’n inremna siam

US leh Qatar-te chuan F-15 fighter jet inleitirna tur inremna an ziak.

Qatar hian US hnen aṭangin F-15 fighter jet 36, dollar tluklehdingawn 12 man a lei dawn a ni. Inremna Nilaini khan Washington DC-ah Qatar Minister of Defence Khalid Al Attiyah leh US Defence Secretary Jim Mattis-te’n an ziakfel a ni. Pentagon chuan Qatar hnena fighter jet tam tham tak leitir tur hian security lamah ram pahnihte tan thawhdunna ṭha leh nghet zawk a siam phah ngei dawn niin a sawi. Inremna an ziah rual hian Mattis leh al-Attiyah-te hian Islamic State (IS) firfiak pawl laka beihpui thlak mek chungchang te, Gulf ramte inkara harsatna awm mek chinfel a pawimawh thu te an sawidun bawk.

Qatar defence ministry pawhin inremna an ziahfel tak thu hi thuchhuah siamin a tarlang. He inremna hian US nena thawhdunna ṭha leh nghet an neihzia a tilang hle niin a sawi a, ram pahnihte chu firfiaka chetna umbo tumin hun rei tak an lo thawkdun tawh niin a sawi.

Tun hnaiah Gulf ram ṭhenkhat chuan Qatar hi firfiak pawl thlawp leh sum hmanga ṭanpui ṭhinah puhin an inzawmna an chhu chat a, Qatar nena an inkalpawhnate pawh an khar a ni. US chuan Gulf ramte hi an harsatna chinfel a, thawhhona ṭha zawk an nei theih nana inbe turin a ngen a ni.