Japan-in anti-terror law pass

Japan parliament chuan nimin khan mi tam tak dodalna karah anti-terror law a pass.

Mi tam tak chuan anti-terror law hian mimal dikna chanvo a palzut sak dawn nia ngaiin duh lohna an lo lantir fo tawh a ni. Nilaini zan khan he dan thar siam tur hi parliament upper house-ah sawiho a ni a, nimin zing khan an pass thei ta a ni.

Bill sawiho a nih lai hian parliament pawn lamah mi tam tak chu duh lohna lantirin an lo pungkhawm a ni. Mahse sorkar chuan kum 2020-a Tokyo-in Olympic Games a thlen tur thlirin, firfiaka chetna do letna dan siam hi thil ṭul leh pawimawh niin a sawi thung.

Bill dodaltu zingah hian national bar assocation bakah academic eng emaw zat an tel a, he bill hi pass a nih chuan thuneituten an hmangsual tei a, pawisawilo mipuite enthlakna atan leh, an zalenna neihte tiderthawnsakna atan an hmang thei dawn niin an sawi. US thuruk puangtu, Edward Snowden leh UN special rapporteur Joseph Cannataci pawhin he dan hi an sawisel bawk. Media ṭhenkhat chuan he dan hi Indopui II hunlaia mipui hrekna dan siam nen an tehkhin a ni.

Parliament-in a pass tak, anti-terror law hnuaia hian firfiak chetna thlen tuma puhte chu kum nga thleng tantir theih an ni dawn. Prime Minister Shinzo Abe chuan he dan hi dik tak leh ṭangkai takin, mipuite venhimna atan hman a ni dawn tih a sawi thung.