Egypt-in Saudi Arabia hnena Red Sea Islands pek remti

Egypt parliament chuan Red Sea thliarkar pahnih chu Saudi Arabia ram hnena pek a remti. Heng thliarkar pahnihah hian mihring cheng an awm lo.

Egypt sorkar hian nikum khan Saudi Arabia hnena thliarkar pahnih pek hi alo remti tawh a, mahse March thla khan court-in a dansak a ni. Hemi hnu hian parliament-ah ngaihtuah a ni leh a, House of Representative Speaker Ali Abdelaal chuan parliament-a member tam zawkin inremna siam tawh hi kaltlangpui an remti tih a sawi. Parliament-in a pass hnu hian President Abdel Fattah al-Sisi pawmpuina lak a ni ve leh ang.

House Committee on Defence leh National Security chuan he ruahmanna hi an lo pawm tawh bawk a ni.

Saudi hnena thliarkar pek tum hi Egypt mipui tam takin an duh lo a, nikum khan lungawi lohna pawh an lo lantir tawh a ni. Mipui lungawi lote hian Saudi Arabia a din hma, kum 1906 aṭang khan heng thliarkar chungah hian Egypt-in thu a nei tawh a ni, an ti. Hetih lai hian Egypt leh Saudi sorkar chuan heng thliarkarte hi Saudi ram tak niin, Saudi Arabia ngenna angin Egypt hian kum 1950 aṭang khan venhim hna a thawk zawk niin an sawi thung.