Trump-a’n Pentagon hnenah thuneihna pe
US President Donald Trump chuan Afghanistan-a US sipaite dah zat tur chungchangah Pentagon chu thuneihna pumhlum a pe.
Defence Secretary James Mattis chuan Senate Armed Services Committee hnenah, Afghanistan-a firfiakte laka beihpui thlak mekah US chuan hnehna ala chang thei lo niin a sawi tawh a, hemi hnu hian President chuan sipai dah zat tur chungchangah thuneihna a pek thu Senate Appropriations Subcommittee on Defence chu a hrilh leh ta a ni. President hian hetiang bawk hian Sryia leh Iraq chungchangah thuneihna a lo hlan tawh bawk a ni.
Pentagon-a thawk ṭhenkhat chuan presient hlui Barack Obama troop management system avang khan chak zawkin an che thei lo niin an sawi a, Afghanistan-a sipai awm zat dik tak pawh thup a ni. President Obama hnuaiah hian kum 2011-a America sipai 100,000 dah luh chu 8,400 velah tihhniam a ni. Afghanistan-a US top commander, General John Nicholson chuan Taliban, IS, leh firfiak pawl dangte bei turin sipai a mamawh belh thu kumin kumtir lam khan a lo sawi tawh a ni.
Kum 2001 aṭang khan US hian firfiakte do let turin Afghanistan-ah hian sipai a tir lut ṭan a, firfiakte nena inbeihnaah America sipai 2,300 chuang an thi tawh a, 17,000 chuangin hliam an tuar tawh bawk.