Tripura Congress-te'n Amit Shah thusawi an dem

Tripura Congress Unit-te chuan Bharatiya Janata Party (BJP) Pre­sident Amit Shah-a'n Mahatma Gandhi chung­chang a sawi dan chu an dem thu sawiin, hemi duh lohna lantir hian Nilaini khan an state khawpui Agartala-ah lungawilohna an lantir.

Congress party thu­chhuah chuan, BJP hruai­tu Amith Shah-a'n India hnampa Mahatma Gandhi-a mi fing vervek anga a sawi chu an dem takzet tih an sawi a, ngaihdam dil tura an phut thu an sawi. Party thupuangtu Tapas Dey chuan, mi fing vervek anga India hnampa sawi a ni ta mai chu an hrethiam lo takzet tih an sawi a, tun hnuah chuan hetiang thil hi thleng tawh lo se an duh tih a sawi. Tripura Congress Chief Birajit Sinha chuan he hun hi a kaihhruai a, Raj Bhavan bula Gandhi lim kiangah hun eng emaw chen lung­awi lohna an lantir a ni.

Pungkhawmte chuan Mahatma Gandhi-a chungchang mawi lo taka sawi a ni chunga Prime Minister Narendra Modi a ngawi reng chu an hrethiam lo hle tih an sawi a, an party president thusawi hi a thlawp ve zawk em ni? tiin zawhna an siam a ni. Hemi chungchangah hian mipuite hnenah ngaihdam dil thuai turin an phut tih sawiin, BJP chu ram mipuite zah loah an puh bawk. BJP president Amit Shah hian kar kalta khan Raipur-a thu a sawinaah Mahatma Gandhi chu 'clever' (chatur) tiin a sawi a ni.

Agartala-a lungawi­lohna lantirnaah hian Youth Congress President Sushanta Chakraborty bakah, Minister hlui Lax­mi Nag, Tripura assembly speaker Jyotirmoy Nath leh congress party hruaitu lawk eng emaw zat an tel a ni.