London Tower kangah chin hriat lohin mi 65 la awm

London-a Grenfell Tower kang vanga thi chu mi 17 an tling tawh a, hetih lai hian chin hriat lohin mi 65 an la awm mek. Thi zat pawh hi an la punchhoh rin a ni.

London Fire Brigade hotu Dany Cotton chuan uifing hmangin ruang zawn hna thawh chhunzawm mek a nih thu a sawi a, chin hriat loha la awmte chu nungdama hmuh an beisei tawh lo tih a sawi. Prime Minister Theresa May-i pawhin he chhiatna thleng chungchang hi chhui chian a tiam. May-i hian Ningani khan kangmei chhuahna Grenfell tower hi a tlawh a, emergency service member-te chu meeting a neihpui nghal a ni.

Tualchhung mite chuan he building himna chungchangah hian warning pek a ni fo tih an sawi. Building hi tunhnaiah dollar maktaduai 11.1 sengin a pawnlam chei ṭhat a ni a, tukverh te siamṭhain rawng pawh hnawih ṭhat a ni. Mahse document-a a landanin building chei ṭhat lai hian kangmei chhuak laka invenna tur dah chungchang tarlan a ni tel lo a, mithiamte chuan in chhawng sang ang chi cheiṭhat a nih chuan hei hi hman ngei a ngai niin an sawi.

Queen Elizabeth pawhin kangmei chhuak avanga thi chhungte leh hliam tuarte a tawrhpui thu a sawi a, midang chhanhimna atana huaisen taka thawktu kangṭhelhtute a fak bawk.

Grenfell Tower-a cheng mi tam tak chu awmna tur lailawk siamsakah an la khawsa zui a, vanduaina tawkte ṭanpuina atan thawmhnaw leh bungraw chi hrang hrang petu an tam hle. Royoal Borough of Kensington and Chelsea chuan ṭanpuina petute chungah lawmthu an sawi a, hemi rual hian donation hi an dawng chhunzawm thei tawh rih lo tih an sawi.