US Senate-in Iran-Russia hrekna thar tur pass

US Senate chuan Iran leh Russia hrekna thar siam chu a pass.

He hrekna thar siam hi Senate-ah ngaihtuahin vote lak a ni a, a thlawp lamah vote 98 tlain duh lo lamah vote hnih a tla thung. Hrekna thar siam hnuaiah hian Iran ballistic missile program kalpuina kawnga khuahkhirhna thar siam a ni a, Iran chu firfiak chetna thlawp zawnga a chet avang leh human rights a palzut avangin hrem theih a ni ang.

Russia sorkar hminga cyber activity lama dik lo taka chete chu thlurbing an ni bawk a, Russia intelligence leh defence sector nena thawkdunte chu hrem theih an ni dawn niin, Senate Committee on Banking, Housing and Urban Affairs thuchhuah chuan a tarlang.

Senate-in Russia leh Iran hrekna thar a siam hma ni hian US Secretary of State Rex Tillerson chuan Russia chungchang an buaipui meknaah roreltute hnenah White House hnenah thuneihna pe turin alo ngen tawh a ni.

Ram pahnihte hrekna tur Senate-in a pass hi House of Representatives-ah ngaihtuah a ni ve ang a, House-a a tlang hnuah President Donald Trump-a hnenah a pawmpuina la tura thawn a ni ve leh ang. President Trump hian he bill hi a lo pawm dawn nge dawn lo erawh hriat theih a la ni lo.