London tower kangah chin hriat lohin 58 la awm

London-a Grenfell tower kan hnuah he building-a cheng mi 58-te chu chin hriat lohin an la awm a, police-te chuan an thi nia an ngaih thu an sawi.

Metropolitian Police Commander Stuart Cundy chuan tower kang vanga thi hriat theih chin chu 30 an tling tawh a, chin hriat loha awm mek mi 58 pawh hi an thi nia rin a nih thu a sawi.

Tower kang chhung hi police leh kangṭhelhtute chuan an la enfiah chhunzawm mek a, Inrinni khan a chhawng chung ber an thleng tawh a ni. Commander Curdy chuan he thil thleng enfiah leh chhuizui hna hian kar eng emaw emaw zat a la awh a rin thu a sawi.

Prime Minister Theresa May-i chuan Grenfell tower kang vanga harsatna tawkte ṭanpui leh chhawmdawlna atan dollar maktaduai 6.4 ruahman a nih thu a sawi. He building-a chengte hi an awmna bul hnaiah awmna tur dang ngaihtauh sak a tiam bawk. Kensington and Chelsea-ah an awmna tur hi kar thum chhunga ngaihtuahsak tum a ni.

May-i chuan in kang vanga tlanchhia, bungrua engmah chuh hman loa an thawmhnaw hak lai nen chauha tlanchhuakte pawh a kawm thu a sawi a, an tana tih theih tur dangte pawh ngaihtuah zel a nih tur thu a sawi bawk.

Hetih lai hian vanduaina thlen hnua an hma lak danah local council, The Royal Borough of Kensington and Chelsea chuan sawisel an tawk nasa hle. Kangmei chhuahna building-a chengte chuan building-a thil thleng chungchangah information pek ṭhat an ni tawk lo tih sawiin, an awm zel dan tur pawh hriattir an ni lo tih an sawi. Council hi kum 2015-a building cheiṭhat chungchangah hmanraw man tlawm zawk hmang leh ngaihsak tawk loha an puh a ni.